ತಿರುಪತಿ ಹಾದೀಲಿ | ಕನ್ನಡ ಜಾನಪದ ಭಕ್ತಿ ಗೀತೆಗಳು #3

ತಿರುಪತಿ ಹಾದೀಲಿ | ಕನ್ನಡ ಜಾನಪದ ಭಕ್ತಿ ಗೀತೆಗಳು #3 [Tirupati Haadili Kannada Janapada Song Lyrics]

ತಿರುಪತಿ ಹಾದೀಲಿ ಕಲ್ಲಿಲ್ಲ ಮುಳ್ಳಿಲ್ಲ

ಸಾಸೀವೆ ತೋರ ಗಿಡವಿಲ್ಲ । ತಿಮ್ಮಪ್ಗೆ

ಸೋಸಿ ಬಿತ್ತಪ್ಪ ಜವನಾವ

ತಿರುಪತಿ ಹಾದೀಲಿ ತಿರುತುಳಸಿ ಮರ ಹುಟ್ಟಿ

ಬೇಲೂರು ಬೇರು ಹರಿದಾವೊ । ತಿಮ್ಮಪ್ನ

ಕಲ್ಯಾಣ್ಕೆ ಮಗ್ಗು ಸುರಿದಾವೋ

ಮೂಡಾಲ ತಿಮ್ಮಪ್ಪ ಮುತ್ತ ಮಾರುತ ಬಂದ

ಬೇಲೂರ ಚೆನ್ನ ಬೆಲೆ ಮಾಡೊ | ಕೊಟ್ಟರೆ

ಬೇಡವೆ ಗಿಡ್ಡಿ ಕೊರಳೀಗಿ

ಯಾಲಕ್ಕಿ ಹೂವಾಯ್ತು ಎಲೆಗೊಂದು ಕಾಯಾಯ್ತು

ಹೋಗೊ ದಾಸರಿಗೆ ಹೊರೆಯಾಯ್ತು | ತಿಮ್ಮಪ್ಗೆ

ಯಾಲಕ್ಕಿಯಾಯ್ತು ಮುಡುಪಿಗೆ

ಮೂಡ ಮುತ್ತಿನ ಗಿರಿಯೋ ಪಡುವ ಚಿನ್ನದ ಗಿರಿಯೊ

ಸೋಲಿಗರ ಸೀಮೆ ಸಿರಿ ಹರಿ | ವೆಂಕಟರಮಣ

ಸೋಲಿಸಬೇಡ ಗೆಲಿಸಯ್ಯ

ಬೆಟ್ಟ ವ ಹತ್ತೂತ ಕಿರುಬೆವರು ಬೆವರೂತ

ನಡೆ ನಡೆಗೆ ಸಂಕ ನುಡಿ ಸೂತ | ತಿಮ್ಮಪ್ನ

ಬೆಟ್ಟ ಹತ್ತುವುದೆ ಬೆಳಗಾಯ್ತು

ಅಣ್ಣ ತಿಮ್ಮಪ್ಪಾನ ಹಣೆಯ ಮೇಲಿನ ನಾಮ

ಇಟ್ಟ ನೂಲೆಸಳು ತೆಗೆದ್ಹಂಗೆ | ತಿಮ್ಮಪ್ಪ

ನಾಮ ಧರಿಸೋದೆ ಬೆಳಗಾಯ್ತು

ವೆಂಕಟರಮಣನೆ ಎಳೆಯ ಗೋವಿಂದಾನೆ

ಸೂಳೇರಿಗೊಲಿಯೊ ಸುಗುಣಾನೆ | ತಿಮ್ಮಯ್ಯ

ಸೋಲಿಸಬೇಡ ಗೆಲಿಸಯ್ಯ

ಬೆಟ್ಟದ ಮೇಲೆ ನಮಗಿಷ್ಟಾರು ಯಾರುಂಟು

ಶ್ರೇಷ್ಠ ತಿಮ್ಮಪ್ಪ ನಮ್ಮಾವ | ಆದಾರೆ

ಇಷ್ಟಾರ್ಥವಿತ್ತು ಸಲಹೂವ

ತಿರುಪತೀ ಹಾದೀಲಿ ತಿದಿದ್ದಯ್ಯ ಹೋರಿಯ

ಗೆಜ್ಜೆಯ ಸರಪಾಣಿ ಧರಿಸಯ್ಯ  | ಮೂಡಾಣ

ದೊಡ್ಡನಿಗೆ ದಂಡ ನಡೆಸಯ್ಯ

ಸ್ವಾಮಿ ಮದುವೆ ಭೂಮಿ ಚಪ್ಪರ ಹೂಡಿ

ಗಾಳಿ ಪಂಜರದ ಗಳ ಬೀಸಿ | ತಿಮ್ಮಪ್ಪ

ಸ್ವಾಮಿ ನಿನ ಮದುವೆ ಶನಿವಾರ

ಬೆಟ್ಟಾದ ತಿಮ್ಮಪ್ಪ ಬೇಲೂರ ಚೆನ್ನೀಗ |

ನಾಗಮಂಗಲದ ನರಸಿಂಹ | ಇವರ್ಮೂವೋರು

ನಾಡೆ ಲೋಕಾದ ಚೆಲುವಾರು