ಕಂಗುವದಲ್ಲಿ ಖಳನಾಯಕನಾಗಿ ಕಾಲಿವುಡ್ ಪಾದಾರ್ಪಣೆ ಮಾಡಲಿರುವ ಬಾಬಿ ಡಿಯೋಲ್

ಕಂಗುವದಲ್ಲಿ ಖಳನಾಯಕನಾಗಿ ಕಾಲಿವುಡ್ ಪಾದಾರ್ಪಣೆ ಮಾಡಲಿರುವ ಬಾಬಿ ಡಿಯೋಲ್ [Bobby Deol To Make His Tamil Debut in Kanguva]

ಹಿಂದಿ ಸಿನಿಮಾದ ಖ್ಯಾತ ನಟ ಬಾಬಿ ಡಿಯೋಲ್ ಅವರು, ಪವರ್‌ಹೌಸ್ ನಟ ಸೂರ್ಯ ಅವರೊಂದಿಗೆ ಮುಂಬರುವ ಚಲನಚಿತ್ರ 'ಕಂಗುವ'ದಲ್ಲಿ ಖಳನಾಯಕನಾಗಿ ಅಭಿನಯಿಸುವ ಮೂಲಕ ತಮಿಳು ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡಲು ಸಿದ್ಧರಾಗಿದ್ದಾರೆ. 

ಈಗಾಗಲೇ  ಪವರ್ ಸ್ಟಾರ್ ಪವನ್ ಕಲ್ಯಾಣ್ ಅವರೊಂದಿಗೆ 'ಹರಿ ಹರ ವೀರ ಮಲ್ಲು' ಚಿತ್ರದ ಮೂಲಕ ತಮ್ಮ ಮೊದಲ ದಕ್ಷಿಣ ಭಾರತದ ಚಿತ್ರದಲ್ಲಿ ನಟಿಸಲು ಸಜ್ಜಾಗುತ್ತಿರುವ ಪ್ರತಿಭಾವಂತ ನಟ, ಈಗ ಈ ರೋಮಾಂಚಕಾರಿ ಚಿತ್ರ 'ಕಂಗುವ' ದಲ್ಲಿ ಸೂರ್ಯ ಅವರೊಂದಿಗೆ ಕೈ ಜೋಡಿಸಲಿದ್ದಾರೆ. 

ವಿಶ್ವಾಸಾರ್ಹ ಮೂಲಗಳ ಪ್ರಕಾರ, ಬಾಬಿ ಡಿಯೋಲ್ ಮುಂದಿನ ತಿಂಗಳು ಬ್ಯಾಂಕಾಕ್‌ನಲ್ಲಿ ತಮ್ಮ ಭಾಗಗಳ ಚಿತ್ರೀಕರಣವನ್ನು ಪ್ರಾರಂಭಿಸಲಿದ್ದಾರೆ. ಈ ಚಿತ್ರದಲ್ಲಿ ಅವರ ಸೇರ್ಪಡೆಯ ಅಧಿಕೃತ ದೃಢೀಕರಣಕ್ಕಾಗಿ ಅಭಿಮಾನಿಗಳು ಮತ್ತು ಚಲನಚಿತ್ರ ಉತ್ಸಾಹಿಗಳು ಕುತೂಹಲದಿಂದ ಕಾಯುತ್ತಿದ್ದಾರೆ.

ತಮಿಳಿನ ಖ್ಯಾತ ನಿರ್ದೇಶಕ ಸಿರುತೈ ಶಿವ ನಿರ್ದೇಶನದ ಮತ್ತು ಆದಿ ನಾರಾಯಣ ಬರೆದಿರುವ 'ಕಂಗುವ' ಚಿತ್ರ ಒಂದು ಫ್ಯಾಂಟಸಿ ಅಡ್ವೆಂಚರ್ ಚಿತ್ರವಾಗಿದ್ದು ಬಹಳ ನಿರೀಕ್ಷೆಯನ್ನು ಮೂಡಿಸಿದೆ. ಈ ಚಿತ್ರವನ್ನು ಹತ್ತು ಭಾಷೆಗಳಲ್ಲಿ 3D ತಂತ್ರಜ್ಞಾನ ದಲ್ಲಿ ಬಿಡುಗಡೆ ಮಾಡಲು ಚಿತ್ರ ತಂಡ ನಿರ್ಧರಿಸಿದೆ.   

ಜುಲೈ 23 ರಂದು ಸೂರ್ಯ ಅವರ ಜನ್ಮದಿನದ ಪ್ರಯುಕ್ತ  ಅವರ ಅಭಿಮಾನಿಗಳಿಗೆ ಸಂತಸ ನೀಡಲು 'ಕಂಗುವ'  ಚಲನಚಿತ್ರದ ಮೊದಲ ನೋಟವನ್ನು ಬಿಡುಗಡೆ ಮಾಡಲಾಯಿತು.  ಈ ಚಿತ್ರದ ಅದ್ಭುತವಾದ ದೃಶ್ಯಗಳು ಮತ್ತು ಸೂರ್ಯ ಅವರ ಅಸಾಧಾರಣ ಅಭಿನಯಕ್ಕಾಗಿ ಈ ಗ್ಲಿಮ್ಪ್ಸ್ ವಿಡಿಯೋ ಮೆಚ್ಚುಗೆಯನ್ನು ಗಳಿಸಿತು.

ಸೂರ್ಯ ಮತ್ತು ಬಾಬಿ ಡಿಯೋಲ್‌ರ ಪ್ರಮುಖ ಜೋಡಿಯಲ್ಲದೆ, ದಿಶಾ ಪಟಾನಿ, ಯೋಗಿ ಬಾಬು, ರೆಡಿನ್ ಕಿಂಗ್ಸ್ಲಿ, ಕೋವೈ ಸರಳಾ, ಆನಂದರಾಜ್, ರವಿ ರಾಘವೇಂದ್ರ, ಮತ್ತು ಕೆ. ಎಸ್ ರವಿಕುಮಾರ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.

ಈ ಚಿತ್ರವನ್ನು ಸ್ಟುಡಿಯೋ ಗ್ರೀನ್ ಮತ್ತು ಯುವಿ ಕ್ರಿಯೇಷನ್ಸ್ ತಯಾರಿಸಿದ್ದು, ಹೆಸರಾಂತ ಸಂಗೀತ ನಿರ್ದೇಶಕ ದೇವಿ ಶ್ರೀ ಪ್ರಸಾದ್ ಅವರು ಸಂಗೀತ ಸಂಯೋಜನೆಯನ್ನು ಮಾಡಿದ್ದಾರೆ. ವೆಟ್ರಿ ಪಳನಿಸಾಮಿ ಛಾಯಾಗ್ರಹಣವನ್ನು, ನಿಶಾದ್ ಯೂಸುಫ್ ಎಡಿಟಿಂಗ್ ಕೆಲಸ ಮಾಡಲಿದ್ದಾರೆ. ನಟರಾಜನ್ ಸುಬ್ರಮಣಿಯನ್ ಎಂದೂ ಕರೆಯಲ್ಪಡುವ ಛಾಯಾಗ್ರಾಹಕ-ನಟ ನಟ್ಟಿ ಅವರು ಖಳನಾಯಕರಲ್ಲಿ ಒಬ್ಬರಾಗಿ ತಮ್ಮ ವರ್ಚಸ್ಸನ್ನು ಚಿತ್ರಕ್ಕೆ ಸೇರಿಸಲು ಸಜ್ಜಾಗಿದ್ದಾರೆ.